طريقة تجديد بطاقة الخدمات المتكاملة 2025 | الخطوات، الشروط، الأوراق
في الفترة الأخيرة، عدد كبير من الناس بدأ يسأل نفس السؤال:
"بطاقتي خلصت... أعمل إيه؟ أفعّلها؟ أجدّدها؟ ولا أبدأ من أول وجديد؟"
السؤال ده بالتحديد بيخص الناس اللي كانوا ضمن المرحلة الأولى من إصدار بطاقات الخدمات المتكاملة، واللي استلموها ما بين نهاية 2019 وبداية 2020. دلوقتي، بعد مرور 5 سنين تقريبًا، كتير منهم بيكتشف فجأة إن البطاقة انتهت أو قربت تنتهي، وبيحتاروا:
هل فيه طريقة لتجديد البطاقة إلكترونيًا؟
هل أحتاج أكشف من تاني؟
وهل فعلاً لازم أعيد كل الإجراءات اللي عملتها أول مرة؟
 |
| نموذج لبطاقة الخدمات المتكاملة لذوى الإعاقة "الكارت الذكي" |
ركز معانا خطوة بخطوة، وخلّي المقال ده دليلك الكامل لتجديد البطاقة من غير لَف ولا دوران.
يعني إيه بطاقة الخدمات المتكاملة؟
بطاقة الخدمات المتكاملة أو الكارت الذكى ببساطة كده، هي بطاقة ذكية بتصدرها وزارة التضامن الاجتماعي، وبتخلي حياة الأشخاص ذوي الإعاقة أسهل بكتير.
وهى أهم نتيجة للقانون رقم 10 لسنة 2018 لحقوق المعاقين
فى تعديلات كتير عملتها الدولة فى القانون الفترة اللى فاتت
اعرف آخر تحديث ومستجدات القانون رقم 10 لسنة 2018 لذوى الإعاقة
البطاقة دي مش مجرد كارت تعريفي، دي مفتاحك لكل الخدمات الحكومية والاجتماعية اللي بتحتاجها، وبدل ما تمشي بأوراق كتير في كل حتة، البطاقة دي بتجمعلك كل حاجة في مكان واحد.
هدفها الأساسي؟
تسهيل دمج الأشخاص ذوي الإعاقة في المجتمع المصري، وإنهم ياخدوا حقوقهم كاملة وبطريقة محترمة، تليق بيهم، وتتماشى كمان مع أهداف التنمية المستدامة اللي بتدعو للمساواة وعدم التمييز.
من له الحق فى بطاقة الخدمات المتكاملة؟
البطاقة بتغطي فئات كتير من الإعاقات، والأهلية بتتحدد بعد كشف طبي دقيق بيقيم نوع ودرجة الإعاقة.
ومن ضمن الفئات اللي ليها الحق في البطاقة:
- ذوي الإعاقات الحركية.
- الإعاقات الحسية زي السمع أو البصر.
- الإعاقات الذهنية.
- المصابين بمتلازمة القزامة.
- مرضى ضمور العضلات.
- حالات فقد السمع التام أو أكتر من 55 ديسيبل.
- مرضى الهيموفيليا.
- الأمراض المزمنة اللي بتهدد الحياة.
- الشلل الدماغي.
- البتر في أكتر من طرف.
- الشلل النصفي أو الرباعي.
- اضطراب فرط الحركة وتشتت الانتباه.
- الجذام.
- اضطراب طيف التوحد.
- أمراض الدم المزمنة.
- تيبس المفاصل في أكتر من طرف.
- مصابي شلل الأطفال في طرف واحد.
يعني لو حضرتك أو حد من أهلك بيعاني من أي حالة من الحالات دي، ليكم الحق تتقدموا وتستفيدوا من بطاقة الخدمات المتكاملة بكل المميزات اللي بتوفرها.
هل البطاقة بتتجدد ولا بتتفاعل؟
ناس كتير بتسأل: "هل أنا محتاج أجدد البطاقة؟ ولا أفعلها؟ ولا هي بتشتغل لوحدها؟"
بصوا يا جماعة، زي ما قولنا قبل كده، بطاقة الخدمات المتكاملة تعتبر زي البطاقة الشخصية بالظبط. ولما البطاقة الشخصية بتنتهي، حضرتك بتروح الأحوال المدنية، بتجيب استمارة، تكتب بياناتك، تتصور، وتستلم البطاقة الجديدة بعد كام يوم.
بطاقة الخدمات المتكاملة نفس النظام، بس بدل ما تروح الأحوال، بتبدأ بإجراءات الكشف الطبي من جديد.
كيف أجدد بطاقة الخدمات
دلوقتي الموضوع اختلف، وبقى لازم تحجز موعد للكشف الطبي من خلال موقع وزارة الصحة والسكان.
الخطوات بالتفصيل:
1. تدخل على موقع وزارة الصحة
نظام حجز مواعيد الكشف الطبى لراغبى الحصول على بطاقة إثبات الاعاقة والخدمات المتكاملة
2. تختار "حجز موعد للكشف الطبي".
3. تكتب رقمك القومي.
4. يظهر لك تاريخ الميلاد والنوع تلقائي.
5. تكتب بياناتك: الاسم رباعي، الحالة الاجتماعية، المحافظة، المدينة، العنوان بالتفصيل، الوظيفة، ورقم تليفون يكون شغال ومتأكد إنه مش هيتقفل.
6. تختار نوع الإعاقة (حركية، سمعية، بصرية، ذهنية... إلخ).
7. تحفظ البيانات وتنتظر من 10 لـ 15 يوم.
8. بعدين تعمل "استعلام" وتشوف حالتك إيه.
نتائج الاستعلام ممكن تكون:
- تم تحديد موعد للكشف الطبي: في الحالة دي بتروح في المعاد للمكان المحدد.
- غير مستوفي الأوراق أو مرتجع إلى اللجنة: معناها في ورق ناقص، فبتعمل "حجز موعد لاستكمال الأوراق".
- إعادة عرض: نفس الكلام، بتحجز موعد جديد وبتروح تكمل باقي الخطوات.
لو جالك تم تحويل الطلب للتضامن الاجتماعي؟
كويس جدًا، بس دي مش النهاية!
بعد تحويلك للتضامن، بتتوجه لمكتب التأهيل تكمل باقي الإجراءات والكشف الوظيفي، وبعدها بتجيلك البطاقة (أو الفيزا) بالبريد.
أوراق مهمة لازم تكون معاك في الكشف الطبي:
- صورة شخصية.
- صورة من بطاقة الرقم القومي سارية.
- إيصال سداد 25 جنيه في الخزينة.
- أي تقارير طبية حكومية مش مر عليها أكتر من 6 شهور.
أوراق مطلوبة في مكتب التأهيل:
- صورة بطاقة الرقم القومي + الأصل.
- شهادة الميلاد.
- في حالة الطفل: حضور ولي الأمر وصورة بطاقته.
- 2 صورة شخصية 4x6 حديثة.
- صورة المؤهل (لو موجود).
- قرار الوصاية في حالة وفاة الأب.
نصيحة مهمة جدًا!
لو بطاقتك لسه فيها 6 شهور أو سنة، ابدأ من دلوقتي في إجراءات التجديد، علشان المعاشات والمميزات المرتبطة بيها ما تتوقفش.
الإجراءات بتاخد وقت طويل، ممكن توصل لـ 6 أو 7 شهور.
الأسئلة الشائعة عن بطاقة الخدمات المتكاملة
1- هل لازم أستنى لما البطاقة تخلص علشان أبدأ إجراءات التجديد؟
لا، يُفضل تبدأ إجراءات التجديد قبل انتهاء البطاقة بـ 6 شهور على الأقل، علشان تضمن استمرار صرف المعاش أو المزايا المرتبطة بالبطاقة بدون توقف.
2- هل تجديد البطاقة بيتم أونلاين بالكامل؟
لا، الحجز بيتم أونلاين فقط من خلال موقع وزارة الصحة، لكن لازم تروح بنفسك للكشف الطبي ثم تتوجه لمكتب التأهيل علشان تكمل باقي الإجراءات.
3- هل التجديد معناه بس تفعيل البطاقة القديمة؟
لأ، التجديد بيتعامل كأنك بتقدم لأول مرة. لازم تكشف من جديد، وتقدم كل المستندات المطلوبة، وتعدي بكل المراحل.
4- ممكن أعرف سبب رفض طلبي؟
أحيانًا الطلب بيرفض لو في أوراق ناقصة، أو لو التقرير الطبي غير كافي لتأكيد الإعاقة. في الحالة دي بيظهر لك على الموقع "غير مستوفي الأوراق" أو "إعادة عرض".
5- هل في طريقة أعمل بها استعلام عن حالة طلبي؟
أيوه، بعد ما تحجز على الموقع، تقدر تدخل على نفس الرابط وتعمل "استعلام" باستخدام الرقم القومي، وهيظهر لك حالة الطلب والمعاد والمكان.
6- أنا عملت الكشف الطبي، وبعتولي إن الطلب اتحول للتضامن، هل كده خلص؟
مش بالضبط. بعد التحويل للتضامن، لازم تروح بنفسك لمكتب التأهيل وتستكمل باقي الأوراق وتعمل كشف وظيفي، وبعدها فقط بتوصلك البطاقة أو الفيزا بالبريد.
7- هل لو أنا من محافظة معينة، ينفع أروح أكشف في محافظة تانية؟
لأ، الكشف لازم يتم في نفس المحافظة اللي تابع ليها الرقم القومي بتاعك. يعني لو بطاقتك تبع أسيوط، مينفعش تكشف في الجيزة مثلًا.
8- البطاقة بتاخد وقت قد إيه لحد ما أستلمها؟
الإجراءات ممكن تاخد من 4 لـ 7 شهور حسب الضغط على النظام وحالة الطلب، علشان كده بننصح تبدأ بدري.
9- هل في طريقة أقدّم بها تظلم لو الطلب اترفض؟
في الغالب، لازم تحجز كشف جديد وتقدم تقارير طبية أقوى، لأن الموقع ما بيدعمش تظلم مباشر، لكن تقدر تحاول التواصل مع مكتب التأهيل المحلي للاستفسار.
10- هل في حد يقدر يساعدني في الإجراءات لو أنا مش بعرف أتعامل مع النت؟
أكيد، ممكن تستعين بأفراد الأسرة، أو تتوجه لأقرب مكتب تأهيل أو وحدة تضامن اجتماعي وهم ممكن يساعدوك في الحجز وتقديم المستندات.
الخلاصة:
تجديد بطاقة الخدمات المتكاملة مش مجرد "تجديد"، هو إعادة تقديم كاملة من الأول، زي استخراجها لأول مرة.
السبب؟ للأسف إن في ناس استغلت النظام، وزورت تقارير وبطاقات، فالدولة شددت الإجراءات.
لو عندك أي سؤال؟
اكتبه في التعليقات اسفل المقال، وهنرد عليك بإذن الله.
استنونا في مقال جديد، وسلام! ✋
قبل ما تخرج من الموقع اقرأ المقال ده👇
الحصول على سيارات ذوى الإعاقة 2025 فى ضوء تعديلات مجلس الوزراء