ازاي أعرف أن الحضانة كويسة.. بقلم: ناردين أمير

إزاي أختار حضانة لابنى

بقلم نادرين أمير
 أخصائية تخاطب وتعديل سلوك

إزاي أختار حضانة لابنى

أول حاجه لازم المسؤول يطلب منك انك تفضلى أول يوم قريبة من المكان اللي فيه ابنك و بالتدريج تمشى لما الطفل يبدأ يحس بالأمان وتانى يوم نزود ساعة وهكذا.

تأكدى من وجود الكاميرات ثم الكاميرات ثم الكاميرات في كل أجزاء المكان؛ لأن للأسف الناس أغلبها مابقاش عندها ضمير وماحدش غير قليل جدًا اللى عنده الجراءه يحكى اللى حصل مع الطفل بالتفصيل.

لو لقيتى الشكاوى كتير جدًا ومفيش ردود افعال مريحة أو منطقية في اللى بيحصل زى إن الطفل يتخبط كتير أو يتعور ومش عارفين من إيه.

 يبقي أكيد في اهمال من المسؤول عن الطفل زى إن يكون وراه اهتمامات أخرى غير إنه يكون مركز وعينه علي الطفل أو عدد الأطفال كتير والمسؤولين عن رعاية الاطفال قليلين.

حاجة كانت بتحصل قدام عينى أنا شخصيًا علي مدار السنين اللى فاتت كل ما الشخص الي قدامك زود في الكلام المعسول بشكل مبالغ فيه ويفضل يحضن ويطبطب ويجامل في الطفل قدامك.

 تأكد أن الشخص ده بيمثل ومش كويس لأن الشخص المتزن مش محتاج يأفور عشان يثبت لك أو  تصدق إنه بيعامل ابنك كويس.

وارد إن الطفل يفضل يعيط أول فترة وهو رايح الحضانة بسبب ارتباطه بيكى فترة طويلة ومش حابب يبعد عن حضنك، ووارد إنه يعيط لأن الحضانة روتينها ممل وبيكون مش مبسوط لانه محتاج يتحرك طول الوقت ومثلا بيقعد فترات طويلة.

ووارد جدًا يكون بيتأذى سواء جسدي أو نفسي لو الفتره طويلة في العياط والطفل ابتدى يظهر عليه حاجات جديده ماكنتش موجوده عنده قبل كده زى (التلعثم أو اللجلجه في الكلام، وضع يده في أماكن حساسة، تبول لا ارادى.

الطفل حصل له انتكاسة بعد ما اتعلم حاجه زى التواليت، ابتدى يعمل علي نفسه تانى خوف شديد مبالغ فيه، عنف شديد مبالغ فيه تجاه الأطفال الآخرين) يبقي فيه حاجه غلط أو غير منطقيه بتحصل جوه ولازم ابحث وافهم إيه الأسباب.

نصيحة من القلب لو الطفل سنه صغير ولسه مش عارف يعبر بالكلام ويحكى  اللى حصل معاه أو كبير و عنده تأخر في الكلام  الطفل ده بيكون عنده لغة استقباليه يقدر يفهمك عن طريق الصور.

هاتى صور للمشاعر والانفعالات واحكى معاه علي اللى حاسس بيه وطلعي صور وشوفي حاسس بأيه وبيشاور على أيه.

لازم نتأكد أن الحضانة دى كويسة وأمينة عليه يا إما اسيب كل اللى ورايا أو بشتغله واتفرغ له، لأنه أكتر طفل بيكون مستهدف هو الطفل اللى مش بيتكلم أو يعبر ويكون عرضة للانتهاكات عند الشخص اللى ماعندوش ضمير أو عنده مشاكل نفسية وممكن يطلع المشاكل دى على الطفل.

ساعات كمان الشخص الغير أمين على الطفل لو بارع في التمثيل ممكن يمثل علي المسؤولين نفسهم إنه شخص أمين وكويس وللأسف يتصدق.

ارجوكم صدقوا أطفالكم لو حكوا معاكم في أى موضوع ماتقولوش ده طفل وبيتهيأله شوف برضو هو بيتهيأله كده ليه وإيه الأسباب وطمنه، أنت الوحيد اللى تقدر تسند ابنك.

انت الملجئ الوحيد الأمين عليه في وسط عالم للأسف مابقاش فيه ضمير ولا رحمة، وبقي كله خداع ونفاق والدنيا بقت كلها مصالح شخصية فقط.

مش عايزين ننكر إن في أمهات عصبية ممكن توصل الطفل لحاله نفسية اسوء كمان من الحضانة بسبب العصبية المفرطة أو العنف الشديد أو الكلام السلبي والمقارنات طول الوقت أو الإهمال أو المشاكل الأسرية وتسبب هى انتكاسة للطفل.

نصيحه لأصحاب الحضانات والمديرين، ارجوكم تابعوا المدرسين فترات طويلة عينكم ماتنزلش من عليهم، الأمهات جابت لكم أعظم ماتملك أمانة بين ايديكم اوعوا تهتموا بالربح قبل التربية أو تهتموا بالربح على حساب أطفال أبرياء.

انتم المسؤولين عن أهم سن ومرحلة في عمر الأطفال انتم اللى هتشكلوا الطفل وهتربوا مع الأم،  لو مش هتقدروا تعملوا ده ابعدوا عن مشروع الحضانة واعملوا مليون مشروع غيره،

واتأكدوا إن لو حتى الناس معرفتش أفعالكم ربنا عمره ماهيرضى بالظلم وعمره ما هيسيب حق الاطفال دول.

شاهد أيضًا:

الكلمات الدلالية:

إزاي أختار حضانة لابنى   مواصفات    الحضانة النموذجية    شروط قبول     معلمة رياض أطفال    أسئلة  المقابلة الشخصية   الروضة   كويسه    كيف أعرف   مشروع الحضانة  ناردين أمير 


google-playkhamsatmostaqltradent