فيفيان أنطون.. مواهب متعددة من نوع خاص

 

فيفيان أنطون فنانة تشكيلية ومطربة موهوبة من ذوي الإعاقة الحركية، والتى حصلت على جائزة من أفضل ٥٠ امرأة مؤثرة وملهمة مصرية لعام ٢٠٢١.

كما قامت بتحكيم الغناء والموسيقى بمهرجان مواهب الإسكندرية، وقد تم تكريمها أيضًا من عدة جهات دولية.

كما قامت مؤخرًا بالمشاركة في الغناء مع الفنانة لطيفة في اغنية فاتحة الحياة بابها في افتتاح ملتقى أولادنا الدولي السادس لفنون ذوي القدرات الخاصة.

فيفيان أنطون
الفنانة فيفيان أنطون


دعونا نتعرف على هذه القصة الملهمة على لسان فيفيان نفسها والتى قالت:

أنا اتولدت انسانة طبيعية جدًا لحد سن سنتين ووالدتي اكتشفت إني عندي كيس دهني آخر العمود الفقري، فقررت إني لازم يتشال وفعلًا راحوا للأطباء وكان هو دة التشخيص إنه كيس دهني.

هو ما كانش مسببلي أي مشاكل بس علشان أنا بنت فوالدتي قالت لأ يتشال علشان مابقاش شكلة مش لطيف.

بس ودخلت أوضة العمليات على هذا الأساس والدكتور قطع أعصاب رجليا الاتنين بعدها ابتدت رحلة المعافرة ومع أن اهلي اتصدموا من أنه فجأة مابقيتش امشي ذي الأول إلا انهم كان عندهم وعي وقدروا يتعاملوا معايا ويربوني على إني انسانة قوية ومافيش حاجة نقصاني.

لحد عمر سنتين تقريبًا وابتدوا يلاحظوا موهبتي في الرسم ابتدوا يشجعوني ومش هم وبس كان مدير المدرسة بتاعتي يقولي شخبطي اعملي اللي تعمليه وهاتيهولي وكان عامللي ذي معرض دائم خاص بي.

وكان لما أغيب عن المدرسة يبعتلي مدرسين الفصل بتاعي بعلبة الألوان وكراسة الرسم ويقولهم قولوا لفيفيان ترسم.

خلصت ثانوية عامة وأنا كان كل حلمي إنى ادخل فنون جميلة لأن موهبتي وقتها كانت كبرت معايا وكونت بدخل مهرجانات الكرازة وكونت دايمًا بأخد مركز أول على مستوى الجمهورية.

الفنانة من ذوى الإعاقة فيفيان أنطون
من أعمال الفنانة فيفيان انطون


لكن للأسف ما قدرتش أدخل فنون جميلة لأنها كانت بعيده عن بيتي وكمان كانت كليه عملية وكان ليا أصدقاء سبقوني ودخلوها كانوا يقولولي إن المشاريع بتاعتهم بيرسموا في أماكن مفتوحة وأنا ما اقدرش اعمل كدة طول الوقت.

فكان قرار والدي خلاص ندخل كلية نظرية وفي نفس الوقت ننمي الموهبة بتاعتي من خلال احتكاكي بدكاترة في فنون جميلة.

المهم دخلت كلية الآداب قسم اجتماع جامعة عين شمس في الأول ما كونتش حباها لكن بعد كدة حبتها وابتديت أحس إنها قريبة جدًا من شخصيتي لأني شخصية اجتماعية وبحب افهم اذاى اتعامل مع اللي حواليا.

كونت بدرس في الجامعة وفي نفس الوقت بمارس موهبتي وابتديت ادخل معارض دولية بدار الأوبرا المصرية وحصلت على جوائز.

في الفترة دي ابتديت إني اكشف عن موهبتي التانية وهي الغناء لأن أنا بطبعي خجولة جدا لأني كونت بنت وحيدة على ٣ اولاد فكونت بتكسف إني اغني قصاد حد.

وفي مرة كان عندنا نشاط كنسي واتشجعت وطلعت قولت ترنيمة من هنا بقى خطفوني في كورال الكنيسة وابتدوا اللي حوالينا يعرفوا إني عندي موهبة الصوت الحلو.

حلمى بكر مع الفنانة فيفيان أنطون
فيفيان أنطون مع الملحن حلمى بكر


وفي مرة جات السيرة قصاد دكتوره عارفانى  كويس دكتور نادية العربي أن دكتوره سهير عبد القادر رئيس ومؤسس ملتقى أولادنا الدولي لفنون ذوي القدرات الخاصة محتاجة أصوات للمشاركة مع الفنانة أنغام في اغنية افتتاح ملتقى أولادنا الدولي الثاني  ورشحتني ليها.

وبالفعل طلبت فويس ليا بأغنية وسمعتها لناس متخصصه في الكونسير وتم اختيارنا أنا و٤ آخرين من ضمن ٢٥٠ واحد واشتركت في الأغنية ووقتها اخدت جايزة دولية في الغناء وفي الفن التشكيلي.

أما بالنسبة لفكرة الارتباط.. طبعا أنا زي أي بنت كان نفسي ارتبط بس احنا كذوي احتياجات خاصة في عندنا مشكلة مع المجتمع إنهم يحبونا وكل حاجة بس في موضوع الارتباط بيبقى الموضوع مش سهل.

لحد ما قابلت عطية ولاقيت ظروفه مشابهه لظروفي بس أفضل واتفقنا إننا هنعتمد على نفسنا في حياتنا لأننا أنا وهو تربيتنا كانت كدة أهالينا ربونا على أننا نعتمد على نفسنا.

أسرة الفنانة فيفيان أنطون


طبعا لاقينا معارضات من الأصدقاء لكن احنا كونا واثقين أن ربنا لو عاوز يكون في ارتباط مش هيسبنا وهيسندنا وفعلا اتجوزنا من ١١ سنة وعندنا بنتين.

شاهد أيضًا





الكلمات الدلالية:

فيفيان أنطون    نماذج ايجابية    امرأة ناجحة     متحدى الإعاقة     مهرجان أولادنا      الفنانة لطيفة    الفن التشكيلى     الكنيسة    مهرجان مواهب اسكندرية    الإعاقة الحركية     معرض

google-playkhamsatmostaqltradent